អន្តរជាតិ៖ ប្រព័ន្ធផ្សព្វផ្សាយរដ្ឋចិនបានផ្សាយថា ប្រទេសចិនបានចាប់ផ្តើមជម្លៀសពលរដ្ឋរបស់ខ្លួនចេញពីប្រទេសអ៊ុយក្រែនហើយ។

យោងតាមកាសែត Global Times ដែលគ្រប់គ្រងដោយរដ្ឋចិនបានដកស្រង់សម្តីពីស្ថានទូតចិនប្រចាំនៅអ៊ុយក្រែន បានឱ្យដឹងថា និស្សិតប្រហែល ៤០០នាក់ដែលមាននៅទីក្រុងកំពង់ផែសមុទ្រខ្មៅនៃ Odessa និង ២០០នាក់ទៀតមកពីរដ្ឋធានី Kyiv បានចាកចេញពីប្រទេសកាលពីថ្ងៃចន្ទ ខណៈពលរដ្ឋ ១ ០០០នាក់ផ្សេងទៀតត្រូវបានគេរំពឹងថានឹងត្រូវបានជម្លៀសទៅកាន់ប្រទេសជិតខាងនៅថ្ងៃអង្គារ។

ផែនការសម្រាប់ជើងហោះហើរ ដើម្បីយកពលរដ្ឋចិនចេញត្រូវបានផ្អាកកាលពីចុងសប្តាហ៍មុន ខណៈដែលការប្រយុទ្ធកាន់តែខ្លាំងឡើង ដោយស្ថានទូតចិនប្រចាំនៅអ៊ុយក្រែនបានលើកឡើងពីហានិភ័យផ្នែកសន្តិសុខ។

កាលពីផ្ទុះការវាយប្រហារភ្លាមៗ ជនជាតិចិននៅអ៊ុយក្រែនមិនបានទទួលបានការណែនាំឱ្យចាកចេញពីប្រទេសនោះទេដោយស្ថានទូតណែនាំឱ្យដាក់ទង់ជាតិនៅកន្លែងដែលពួកគេរស់នៅ៕